Innkjøpsordningane for litteratur

Under innkjøpsordningane for litteratur kjøper Norsk kulturråd inn nye boktitlar for å sende dei vidare til norske folke- og skulebibliotek og til nokre undervisningsstader og bibliotek i utlandet. Desse bøkene kjem i tillegg til dei titlane biblioteka sjølve kjøper inn over eigne budsjett.

Sjå alle påmeldte og innkjøpte bøker

Vi har i dag fem innkjøpsordningar for litteratur:

• Ny norsk skjønnlitteratur, 773 eksemplar av bøker for vaksne (703 p-bøker og 70 e-bøker), 1720 eller 1750 eksemplar av bøker for barn og unge (hhv. 1650 p-bøker for barn og unge t.o.m. 4 trinn og 1680 p-bøker for barn og unge f.o.m. 5. trinn, samt 70 e-bøker)
• Omsett litteratur, 542 eksemplar (502 p-bøker og 40 e-bøker)
• Ny norsk sakprosa, 773 eksemplar (703 p-bøker og 70 e-bøker)
• Ny norsk sakprosa for barn og unge, 1720 eller 1750 eksemplar (hhv. 1650 p-bøker for barn og unge t.o.m. 4 trinn og 1680 p-bøker for barn og unge f.o.m. 5. trinn, samt 70 e-bøker)
• Teikneseriar (1680 eksemplar av bøker for barn og unge og 703 eksemplar av bøker for vaksne)

Kor mange titlar som blir kjøpte inn av ny norsk skjønnlitteratur, varierer for kvart år, ettersom alle bøker som er vurderte til å ha høg nok kvalitet, kjem med på innkjøpsordningane. Forlaga må allereie ha trykt og gitt ut bøkene før dei blir vurderte for innkjøp.

Når det gjeld sakprosa for barn og ungdom og vaksne, omsett litteratur og teikneseriar (såkalla selektive ordningar), er det øvre titteltalet bestemt på førehand, og innkjøpet gjort etter ei kvalitetsvurdering og deretter ei prioritering av dei beste påmelde bøkene.

For alle innkjøpsordningane gjeld særskilde retningsliner. Eigne vurderingsutval er oppnemnde for å sjå til at dei påmelde bøkene er gode nok til å bli innkjøpt, og at dei oppfyller krava ordningane set til sjanger. Forlaga kan ikkje klage på anna enn sakshandsaminga.